لوح زحل کی تیاری کا ایک نادر موقع، باقوت اوقات کی نشان دہی

سیارہ زحل ایک سست رفتار سیارہ ہے، ایک برج میں اس کا قیام تقریباً ڈھائی سال رہتا ہے، دائرئہ بروج کا ایک چکر یہ تیس سال میں مکمل کرتا ہے، زحل کا تعلق مزدور طبقے سے ہے، محنت، مشقت کرنے والے افراد کا سیارہ زحل ہے، یہ وہی لوگ ہیں جو مسلسل محنت کرکے زندگی میں اپنا کوئی مقام بناتے ہیں، زحل کا تعلق پائیداری اور استحکام سے ہے لیکن یہ ضرور ہے کہ اپنی سست رفتاری کی وجہ سے سیارہ زحل کے مثبت نتائج تاخیر کا شکار ہوتے ہیں۔

برج جدی اور دلو کا تعلق سیارہ زحل سے ہے، چناں چہ یہ لوگ بھی مسلسل محنت اور جدوجہد کے بعد ہی کسی بلند مقام کے حصول میں کامیاب ہوتے ہیں، ان میں مستقل مزاجی ، صبروبرداشت دوسرے افراد سے زیادہ ہوتی ہے، برج جدی اپنی ماہیت میں منقلب اور عنصر کے اعتبار سے خاکی برج ہے، گویا مادّیت اور عملیت اس کا طرئہ امتیاز ہے، جدی افراد بے مقصد اور فضول کاموں میں وقت ضائع کرنا پسند نہیں کرتے، وہ اپنی منزل کی طرف آہستہ روی سے قدم بہ قدم آگے اور آگے بڑھتے رہتے ہیں، راہ میں آنے والی مشکلات اور دشواریاں انھیں پریشان کرتی ہیں لیکن وہ ان سے نہیں گھبراتے۔

 برج دلو اپنی ماہیت میں ثابت (Fixed) اور عنصر کے اعتبار سے ہوائی برج ہے، یہ لوگ خدمت خلق کے جذبے سے سرشار اور انوکھی یا عجیب باتوں اور چیزوں کے رسیا ہوتے ہیں،جدت پسندی ، نیا پن انھیں مرغوب ہے، یہ روایتی طور طریقے اختیار نہیں کرتے بلکہ روایت کے خلاف جانا پسند کرتے ہیں، ہوائی برج ہونے کی وجہ سے ان کے خیالات اور آئیڈیاز بہت دور دراز کے ہوتے ہیں لیکن ان کی اہمیت سے انکار نہیں کیاجاسکتا، انھیں آزادی بہت عزیز ہے لہٰذا عام طور پر پابندیوں سے بے زار رہتے ہیں، جدی اور دلو دونوں کا حاکم سیارہ زحل ہے لیکن دونوں برج اپنے مزاج اور فطرت میں ایک دوسرے سے مختلف ہیں۔

سیارہ زحل کو اپنے برج جدی یا دلو میں عروج حاصل ہوتا ہے، برج قوس میں اوج کی قوت ملتی ہے جب کہ برج میزان میں اسے شرف ہوتا ہے جو زحل کی سب سے زیادہ طاقت ور پوزیشن ہے، برج حمل میں اسے ہبوط ہوتا ہے جو ایک بدترین پوزیشن ہے ،سیارہ شمس 25جنوری 2020 ءسے اپنے ذاتی برج جدی میں عروج کی حالت میں ہے لیکن گزشتہ دو سالوں میں یہ راہو کیتو کی قربت یا نظر کے سبب مسلسل متاثرہ پوزیشن میں رہا، اس سال اسے راہو کیتو کی نحوست سے نجات مل گئی ہے لہٰذا زحل کی بھرپور قوت سے اکثر لوگ فائدہ اٹھائیں گے جب کہ بعض افراد کے لیے اس کی پوزیشن نقصان دہ بھی ہوسکتی ہے، اس کا انحصار کسی بھی شخص کے انفرادی زائچے کے مطابق ہی ہوگا۔

زحل کی ساڑھ ستی

زحل کے حوالے سے اگر کوئی بات سب سے زیادہ مشہور ہے تو وہ سیارہ زحل کی ساڑھ ستی ہے، اس کے علاوہ ڈھیّایا آٹھویں گھر کی پوزیشن بھی منحوس اثرات کی حامل سمجھی جاتی ہے، زحل کی یہ شہرت ہمارے پاکستانی اکثر منجمین اور بھارتی کلاسیکل ویدک سسٹم کے ماہرین کے غلط اور گمراہ کن نظریات کی وجہ سے ہے، اکثر منجمین کا علم نجوم زحل کی ساڑھ ستی سے شروع ہوکر زحل کی ساڑھ ستی ہی پر ختم ہوجاتا ہے، ان کے پاس اپنے مسائل کے لیے آنے والے ہر شخص کے لیے ایک ہی فتویٰ ہوتاہے، زحل کی ساڑھ ستی، چناں چہ ملک کا ہر شخص جو علم نجوم سے تھوڑی بہت بھی دلچسپی رکھتا ہے ، ساڑھ ستی کے خوف میں مبتلا رہتا ہے،اکثر لوگ ہمیں فون کرکے اطلاع دیتے ہیں کہ وہ زحل کی ساڑھ ستی کا شکار ہیں، اس سے نجات کا کوئی طریقہ بتائیں لیکن جب ہم ان کا زائچہ دیکھتے ہیں اور انھیں یہ بتاتے ہیں کہ آپ ان لوگوں میں سے ہیں جن کو کبھی بھی زحل کی ساڑھ ستی لگ ہی نہیں سکتی تو وہ حیران ہوتے ہیں۔

عزیزان من! ساڑھ ستی کا لفظ خالص ویدک سسٹم سے آیا ہے، یونانی سسٹم میں ساڑھ ستی کا کوئی تصور نہیں ہے لیکن ہمارے اکثر منجمین جو ویدک سسٹم سے کام لے رہے ہوں یا یونانی سے ساڑھ ستی کا فتویٰ دینے سے گریز نہیں کرتے، اس کی وجہ ان کی کم علمی اور جہالت ہے، مزید یہ کہ قدیم ویدک سسٹم میں بھی ساڑھ ستی کا نظریہ جنم راشی (قمری برج) سے ہے یعنی سیارہ زحل اگر قمری برج سے بارھویں ، پہلے اور دوسرے گھر سے گزرے تو ساڑھ ستی کی نحوست تسلیم کی جاتی ہے مگر ہمارے ہاں یونانی سسٹم کو فالو کرنے والے منجمین سیارہ شمس یا طالع پیدائش سے بھی ساڑھ ستی کا فتویٰ دینے سے گریز نہیں کرتے کیوں کہ کسی بھی شخص کے اصل مسائل سمجھنے اور اس کے زائچے کا تجزیہ کرنے کی وہ صلاحیت ہی نہیں رکھتے لہٰذا ساڑھ ستی کے ٹوٹکے پر ہر شخص کو ہانکتے رہتے ہیں، آئیے ہم آپ کو بتائیں اصولی طور پر جدید ویدک سسٹم میں بھی ساڑھ ستی کے لیے کون سے اصول مقرر ہیں۔

سب سے پہلے یہ دیکھنا ضروری ہے کہ صاحب زائچہ کا طالع برج کون سا ہے ، طالع برج سے مراد وہ برج ہے جو اس کی پیدائش کے وقت پر طلوع تھا نہ کہ شمسی برج جو صرف تاریخ پیدائش سے معلوم ہوتا ہے، اب بنیادی اصول یہ ہے کہ بارہ طالع بروج کے لیے سیارہ زحل کی پوزیشن جداگانہ ہیں، صرف تین برج ایسے ہیں جن کے لیے سیارہ زحل فعلی منحوس سیارے کا کردار ادا کرتا ہے، باقی 9 برجوں کے لیے وہ فعلی سعد سیارہ ہے، سعد ہونے کی بنیاد پر وہ کسی صورت میں بھی ان کے لیے نحوست ، مصیبت یا کسی بھی پریشانی کا باعث کیسے ہوسکتا ہے؟

بارہ برجوں میں زحل کا کردار

طالع پیدائش برج حمل کے تحت سیارہ زحل زائچے کے دسویں اور گیارھویں گھر کا حاکم ہے جو انتہائی سعد گھر ہیں، دونوں گھروں کا تعلق کرئر ، پیشہ ورانہ معاملات، کاروباری منافع، زندگی میں حاصل ہونے والے فوائد سے ہے لہٰذا کبھی بھی خواہ کوئی بھی صورت ہو ، یہ لوگ زحل کی ساڑھ ستی کا شکار نہیں ہوسکتے۔

طالع برج ثور کے تحت سیارہ زحل نویں اور دسویں گھر کا مالک ہے، نواں گھر قسمت، باپ، مذہب، آئین و قانون سے متعلق ہے جب کہ دسواں گھر کرئر سے،سیارہ زحل ہر گز طالع برج ثور کے لیے کبھی نحس اثر نہیں دے گا اور ان لوگوں کو کبھی ساڑھ ستی کا سامنا نہیں ہوگا۔

طالع برج جوزا کے تحت سیارہ زحل زائچے کے آٹھویں اور نویں گھر کا حاکم ہے،آٹھواں گھر برج جدی زحل کا ذیلی برج ہے جب کہ نواں گھر دلو مول ترکون برج ہے، آٹھویں گھر پر برج جدی کی کوئی اہمیت نہیں ہے، اصل اہمیت طالع جوزا کے لیے برج دلو کی ہے جس کا تعلق اس کی قسمت سے ہے لہٰذا جوزا والوں پر بھی کسی ساڑھ ستی کا کوئی سوال پیدا نہیں ہوتا۔

طالع برج سرطان کے تحت سیارہ زحل ساتویں اور آٹھویں گھر کامالک ہے، اس صورت میں زحل کا مول ترکون برج آٹھواںنحوست آثار ہے، بلاشبہ زحل طالع سرطان والوں کے لیے سب سے زیادہ منحوس اثر رکھنے والا سیارہ ہے، یہ زائچے کے جس گھر میں بھی جائے گا کسی نہ کسی پریشانی کا سبب بنے گا اور جب قمری برج سے بارھویں ، پہلے اور دوسرے گھر میں آئے گا تو ساڑھ ستی کا سبب ہوگا، دائرئہ بروج کا یہ پہلا برج ہے جو زحل کی ساڑھ ستی کا شکار ہوتا ہے لیکن عام طور پر ایسا زندگی میں ایک یا دو بار ہی ہوگا۔

طالع برج اسد کے تحت سیارہ زحل آٹھویں اور چھٹے گھر کا حاکم ہے،یہاں بھی چھٹا گھر ذیلی ہے اور آٹھواں گھر مول ترکون برج ہے لہٰذا برج اسد والوں کے لیے زحل ایک سعد اثر رکھنے والا سیارہ ہے، ان لوگوں پر کبھی ساڑھ ستی نہیں لگے گی۔

طالع برج سنبلہ کے تحت سیارہ زحل زائچے کے چھٹے گھر اور پانچویں گھر کا حاکم ہے، چھٹے گھر پر زحل کا مول ترکون برج ہے لہٰذا سنبلہ والوں کے لیے سیارہ زحل فعلی منحوس سیارہ بن جاتا ہے اور جب بھی کسی دوسرے گھر سے گزرتا ہے، مصائب و مشکلات لاتا ہے،قمر سے بارھویں ، پہلے اور دوسرے گھر میں ساڑھ ستی کا اثر دیتا ہے۔

طالع میزان کے تحت سیارہ زحل چوتھے اور پانچویں گھر کا حاکم ہے،یہ صورت حال برج میزان والوں کو سعد اثر دیتی ہے، زحل ان کے زائچے میں ”یوگ کارک“یعنی زائچے کا سب سے مبارک سیارہ ہے،مزید یہ کہ برج میزان ہی میں اسے شرف کی قوت حاصل ہوتی ہے لہٰذا میزانی افراد بھی کبھی کسی ساڑھ ستی کا شکار نہیں ہوتے۔

طالع برج عقرب کے تحت سیارہ زحل زائچے کے تیسرے ، چوتھے گھر کا حاکم ہے اور سعد اثر رکھتا ہے، ان لوگوں پر بھی کبھی ساڑھ ستی کا اصول لاگو نہیں ہوتا۔

طالع برج قوس کے تحت سیارہ زحل زائچے کے دوسرے اورتیسرے گھر کا حاکم ہے اور سعد اثر رکھتا ہے، ان پر بھی ساڑھ ستی نہیں لگتی۔

طالع برج جدی اور دلو کے تحت سیارہ زحل ان کا حاکم سیارہ ہے، گویا ان کا ذاتی سیارہ ہے، وہ کیسے ان کے خلاف نحوست کا اثر دے سکتا ہے، یہ بھی کبھی زحل کی ساڑھ ستی کا شکار نہیں ہوتے۔

طالع برج حوت کے تحت سیارہ زحل زائچے کے گیارھویں اور بارھویں گھر کا حاکم ہے، بارھویں گھر میں اس کا مول ترکون برج دلو ہے لہٰذا حوت افراد کے لیے سیارہ زحل یقینا ایک فعلی منحوس سیارہ بن جاتا ہے اور یہ لوگ بھی زحل کی ساڑھ ستی کا شکار ہوسکتے ہیں۔

یہ طویل تجزیہ اور تفصیل دینے کا مقصد یہی ہے کہ عام لوگ جو عطائی قسم کے منجمین کی باتوں میں آکر خوف زدہ اور پریشان ہوتے ہیں،حقیقت حال سے آگاہ ہوسکیں اور سمجھ لیں کہ صرف تین برج ایسے ہیں جو سیارہ زحل کی ساڑھ ستی کا شکار ہوسکتے ہیں، اول برج سرطان، دوم سنبلہ اور سوم برج حوت، اس کے علاوہ باقی کوئی برج زحل کی ساڑھ ستی کا شکار نہیں ہوتا بلکہ زحل ان کی زندگی میں مثبت کردار ادا کرتا ہے، یہ الگ بات ہے کہ ان کے زائچہ پیدائش میں سیارہ زحل کسی دوسرے منحوس سیارے سے متاثر ہورہا ہو، خاص طور پر راہو کیتو سے یا پھر زائچے کے چھ، آٹھ، بارہ گھروں میں ہو، جیسا کہ آج کل برج دلو والوں کی پوزیشن ہے، اس کے علاوہ زحل کی سعادت ہر برج کو اس کی پوزیشن کے مطابق ضرور حاصل رہتی ہے۔

لوح زحل

سیارہ زحل کی خراب پوزیشن یا پیدائش کے زائچے میں زحل کی خرابی مثلاً وہ برج ہبوط میں ہو یا زائچے ہی میں دوسرے منحوس سیاروں سے متاثر ہو تو زندگی میں خرابیاں ، کمزوریاں وغیرہ پیدا ہوتی ہیں، اس کے علاوہ چوں کہ زحل کا کام استحکام اور مضبوطی دینا ہے ، مزاج میں ، فطرت میں، مالی معاملات میں، ازدواجی زندگی میں اس مقصد کے تحت لوح زحل تیار کی جاتی ہے اور کسی ایسے وقت میں جب زحل باقوت پوزیشن میں ہو یا زحل شرف یافتہ ہو، اس لوح کو پاس رکھنے سے پیدائشی زائچے میں زحل کی کمزوری یا دیگر خرابیاں دور ہوتی ہیں۔

وہ لوگ جو کسی بھی سیارے کی خرابی یا نحوست کا شکار ہوں ان کے لیے ایک خصوصی دعا بھی یہاں دی جارہی ہے جسے ورد میں رکھنا فائدہ بخش اور نحوست سیارگان سے نجات کا باعث بنتا ہے، دعا یہ ہے ۔

دعائے رد نحوست سیارگان

ِبسمِ اللّٰہِ الاعظمُ الَّذِی لایَضُّر مَعَ السِمُہ شَئیً فِی الَارضِ وَلَا فِی السَّمَاءوَ ھُوَا السَّمِیعُ العَلیمُ۔ یَا اللّٰہ یَا رَحمٰنُ یَا رَحِیمُ یَا نَاصِرُ یَا مُعِینُ یَا فتَّاحُ یَا رَزَّاقُ یَا مَالِکِ یَومِ الدِّین۔ اَللّٰھُم اَحفِظنِی مِن نَحُوسَتِ الزَّحُلِ وَالمُشتَری وَالمِرِیخ وَالشَّمسِ وَالقَمَرِ وَالعَطارَدِ والزَّھرَہ وَالذَنبِ وَالِرَاسِ وَالَاکلیلُ وَالِکَبدِمِن بِرِیعَتِ اَجمَعِینَ وَمِن نَحُوسَتِ الاَسمَائِ وَمِن شَرِّالاٰشرار ومَنِ شَرِّالکُفَّار وَمِن شَرِّ الشَّیاطِینَ بِحَقِ کٓھٰیٰعٓصٓ وٓ بِحَقِ حٰمٓعٓسٓقٓ۔یَاحیّ یَا قَیّومُ یَا عَلِی یَا عَظِیمُ یَا کَافِی یَا غَنِی یَا کَبِیرُ یا مُتَعَالُ یَا مَالِکُ یَا قُدّوسُ یَالَم یَلِد وَلَم یُولَدوَلَم یَکُن لَہُ کُفُواً اَحَد۔

اس دعا کو روزانہ 3,5,7,11 مرتبہ پڑھ کر دعا کرنی چاہیے، وہ لوگ جو وقت کی سختی کا بری طرح شکار ہوں اور وہ سختی کسی بھی سیاروی نحوست کا سبب ہو، انھیں اس کو اپنے نام مع والدہ کے اعداد نکال کر ان کے مطابق پڑھنا چاہیے تو ان شاءاللہ وقت کی سختی سے یقینا نجات ملے گی۔

لوح زحل برائے استحکام 

اکثر لوگ یہ شکایت کرتے نظر آتے ہیں کہ ان کی زندگی میں استحکام نہیں ہے، کاروباری یا دیگر معاملات اکثر اتار چڑھاو کا شکار رہتے ہیں، ملازمت ہو یا کاروبار ، کسی معاملے میں بھی استحکام حاصل نہیں ہوتا، اسی طرح اکثر لوگوں کی ازدواجی زندگی میں بھی ایسے مسائل پیدا ہوتے رہتے ہیں جو ان کے لیے پریشانی کا باعث بنتے ہیں اور خاص طور سے خواتین طلاق کے خوف میں مبتلا رہتی ہیں، اسی طرح کسی جائیداد، زمین وغیرہ کے ہاتھ سے نکلنے یا کسی اچھی جاب کے ختم ہونے کا خدشہ پریشانی اور فکر مندی کا باعث بنتا ہے، ایسے لوگوں کے لیے لوح استحکام سیارہ زحل کے سعد اوقات میں تیار کی جاتی ہے۔

اللہ تعالی کے مبارک اسماءالحسنیٰ میں سے 6 اسمائے الٰہی ایسے ہیں جو سیارہ زحل کی سختی کا بھی خاتمہ کرتے ہیں اور زندگی کے تمام امور میں پائیداری اور استحکام لاتے ہیں جو یہ ہیں۔

ُھوَا اللّٰہُ الرّحمٰنُ الرّحِیمُ المَلِکُ القُدّوسُ

ان اسمائے الٰہی کے کل اعداد 1017 ہےں لہٰذا اس تعداد میں روزانہ پڑھ کر دعا کی جائے تو یقینا زندگی کے ہر معاملے میں استحکام پیدا ہوگا اور اسمائے الٰہی کی برکت سے مزید حصول سعادت حاصل ہوگا۔

اسمائے الٰہی یا فتاح ُ الرزاق کا تعلق سیارہ زحل سے ہے، اس کی لوح زحل سے ہے، اس کی لوح مبارک اپنی مثال آپ ہے، بے شک اس کی تیاری آسان نہیں ہے لیکن سیسہ نرم دھات ہے،سیسے کی تختی پر کسی بھی نوک دار چیز سے با آسانی یہ لوح کندہ کی جاسکتی ہے، عام افراد کی سہولت کے لیے ہم مکمل لوح یہاں دے رہے ہیں ، مقررہ وقت پر باوضو بیٹھ کر اسے کندہ کرلیں اور سمجھ لیں کہ ایک بیش قیمت تحفہ آپ نے حاصل کرلیا ہے جو زندگی میں ہمیشہ استحکام ، ترقی اور ہر قسم کی نحوستوں سے نجات میں مددگار ثابت ہوگا، مندرجہ بالا اسمائے الٰہی 99 مرتبہ اور یا فتاح الرزاق بھی 99 مرتبہ ہمیشہ اپنے ورد میں رکھیں، لوح کی تیاری کے بعد کسی بھی نوچندے ہفتے کو سورج طلوع ہونے کے فوری بعد مندرجہ بالا اسمائے الٰہی کا ورد کرکے لوح پر دم کریں اور اسے پاس رکھ لیں، بعد ازاں 8 بوڑھے یا معذور افراد کو کھانا کھلائیں، لوح معظم یہ ہے۔

موثر اوقاتِ زحل

سیارہ زحل جنوری کے مہینے میں ایسی باقوت پوزیشن میں ہوگا جب لوح زحل کندہ کرنا موثر ہوگا، اس حوالے سے مندرجہ ذیل اوقات اسلام آبادٹائم کے مطابق دیے جارہے ہیں ، دیگر شہروں کے شائقین اپنے شہر کا اسلام آباد سے تفاوت وقت معلوم کرکے دیے گئے اوقات کو درست کرسکتے ہیں۔

11 جنوری بہ روز بدھ قبل طلوع آفتاب 04:13am سے 06:02 am ۔

12 جنوری 06:10 am سے 07:06 am ۔

12 جنوری 08:53 am سے 09:44 am ۔

13 جنوری قبل طلوع آفتاب 03:58 am سے 05:10 am ۔

13 جنوری 06:10 am سے 07:17am ۔

14 جنوری 03:58 am سے 05:04 am ۔

14 جنوری 08:07 am سے 09:05 am ۔

15 جنوری 07:17 am سے 08:11 am ۔

16 جنوری 08:11 am سے 09:05 am ۔

لوح کو کندہ کرنے سے پہلے سیارہ زحل کا بخور جلائیں جو میعہ سائلہ ہے،ا گر ایک وقت میں لوح مکمل نہ ہوسکے تو باقی کام دوسرے وقت میں بھی کیا جاسکتا ہے۔

جو لوگ اس لوح کو خود تیار نہ کرسکیں وہ وقت سے پہلے براہ راست رابطہ کریں۔