شرف شمس کا موسم اور عظیم تحائف علم جفر
لوح اسم اعظم اور خاتم اسم اعظم کی تیاری کا طریقہ
سورج ہمارے نظام شمسی کا مرکزی سیارہ ہے دیگر تمام سیارگان اس کے گرد چکر لگا رہے ہیں اور اس سے روشنی حاصل کرتے ہیں۔
سورج کی روشنی زمین پر زندگی کے لیے توانائی بخش ہے، اس کا ذاتی برج اسد ہے لیکن جب یہ برج حمل میں داخل ہوتا ہے تو اسے شرف کی قوت حاصل ہوتی ہے۔
سورج کو تمام سیارگان کے درمیان ایک بادشاہ کا مقام حاصل ہے، برج حمل میں اس کے داخلے سے دنیا میں موسم بہار کا آغاز ہوتا ہے۔
ماہرین علم جفر و نجوم اس کے شرف شمس کی قوت کو بلندی ء مراتب، قوت و اقتدار کی حصول یابی، مقدمات میں کامیابی، رعب و دبدبے اور اعلیٰ عہدہ و مراتب کا حصول، عزت و وقار میں اضافہ، اعلیٰ حکام و افسران کی تسخیر اور ان کی نظر میں عزت و مقام حاصل کرنے کے لیے موثر خیال کرتے ہیں اور اس موقع پر خصوصی الواح و نقوش تیار کیے جاتے ہیں جن میں سے اکثر انتہائی مشکل و پیچیدہ ہیں جن سے عام آدمی استفادہ نہیں کرسکتا۔
ہم نے ہمیشہ ایسے آسان اور عام فہم طریقوں پر زور دیا ہے جو عام آدمی کے لیے قابل فہم و عمل ہوں اور لوگ ان سے باآسانی استفادہ کرسکیں۔
گزشتہ مضمون میں شرف شمس کے اوقات بہ حساب یونانی اور ویدک دیے گئے تھے ۔ بہ حساب یونانی شرف کا وقت 7اور 8اپریل 2025تھا۔ جب کہ ویدک سسٹم کے مطابق 2اور 3مئی ہے۔ ہمارے نزدیک دونوں اوقات کارآمد ہیں۔
اگرعلم نجوم کے اصول و قواعد سے حقیقی واقفیت حاصل ہو اور خصوصاً نقوش و طلسمات کے لیے مناسب وقت کے استخراج کی صلاحیت ہو، یہ صلاحیت علم نجوم سے گہری واقفیت کے بغیر ممکن نہیں ہے۔
اکثر ہمارے ماہرین علم جفر علم نجوم کی سطحی شدھ بدھ رکھتے ہیں، وہ صرف مروجہ جنتریوں میں دیے گئے اوقات شرف یا اوج وغیرہ کو فالو کرتے ہیں، بے شک جنتریوں میں درست وقت دیے جاتے ہیں لیکن ضروری نہیں ہے کہ وہ اوقات کسی نقش یا طلسم کی تیاری کے لیے سو فیصد درست اور معیاری ہوں۔
مثال کے طور پر شرف زہرہ کے لیے بہ حساب یونانی جو اوقات دیے گئے تھے وہ کسی طور بھی سعدیت کے حامل نہیں تھے کیوں کہ زہرہ درجہ ءشرف پر ہونے کے باوجود راہو کیتو کے نحس اثرات کا شکار تھا اور یہ صورت حال کسی طور بھی زہرہ کے شرف کی سعادت کے حصول میں معاون و مددگار نہ تھی۔
ہم نے اس طرف اشارہ بھی کیا تھا اور وعدہ کیا تھا کہ سیارہ زہرہ اس سال مئی تک اپنے برج شرف میں رہے گا اور ہم ان شاءاللہ آئندہ ایسے سعد وقت کی نشان دہی کریں گے جب اعمال زہرہ کیے جاسکیں۔
شرف شمس کے موقع پر اس نوعیت کی خرابیاں موجود نہیں ہیں اور ہمارے نزدیک بہ حساب یونانی یا ویدک سسٹم دونوں اوقات موثر ہیں۔
بہ حساب ویدک 2 مئی 2025 کو شمس اپنے شرف کے درجے پر دوپہر 01:54 سے 3 مئی کی دوپہر 02:39 تک رہے گا۔
اس عرصے میں سیارہ شمس کی ساعت میں شمس سے متعلق نقوش و طلسمات کی تیاری موثر اور زود اثر ہوسکتی ہے، اگر تمام اصول و قواعد کی پابندی کی جائے۔
لوح اسم اعظم
شرف شمس کے موقع پر لوح اسم اعظم بھی تیار کی جاسکتی ہے، یاد رہے کہ اسم اعظم صرف ایک ہی ہے اور وہ ہے اسم ذات ”اللہ“ باقی تمام اسمائے الٰہی اسمائے صفات باری تعالیٰ ہیں۔
ہمارے یہاں اہل تصوف دیگر اسمائے صفات کو بھی اسم اعظم قرار دیتے ہیں جن میں یا حی یا قیوم سر فہرست ہیں۔اسم اعظم کے معنی سب سے بڑا نام ہے اور وہ سوائے اللہ رب العزت کے کس کا ہوسکتا ہے۔
اسم اللہ کے ابجد قمری سے اعداد 66 ہیں۔ا ل ل ہ۔ 1+30+30+5=66۔
اب 66 کے مرکب عدد کی کرشمہ سازی کے بارے میں بھی جان لیجئے، یہ عدد قدیم زمانوں سے مقدس و متبرک سمجھا جاتا رہا ہے، آثار قدیمہ کی کھدائی کے دوران میں پتھروں اور دھاتوں کی ایسی تختیاں برآمد ہوتی رہی ہیں جن پر یہ عدد کندہ پایا گیا یا بعض قدیم نقوش و الواح پر اس کا استعمال نظر آتا ہے۔
بر صغیر کے عظیم جفار صاحبِ رموز الجفر حضرت کاش البرنی ؒ لکھتے ہیں”مجھے یہ تحقیق نہ ہوسکا کہ قدیم زمانے کے لوگ اس عدد کو کیوں مقدس و متبرک مانتے تھے، البتہ اسلام کی سربلندی سے یہ راز فاش ہوا کہ 66 عدد اسم ذات اللہ کے ہیں”۔
ء66 عدد کے نقوش کی کتب جفر و عملیات میں کوئی کمی نہیں، علم النقوش پر دسترس رکھنے والا کوئی بھی صاحب علم 66 کا نقش کسی بھی انداز میں مرتب کرسکتا ہے مگر اس کا طبعی نقش عجیب و حیرت انگیز ہے، یہ علم ریاضی کا بھی ایک حیرت انگیز شاہ کار ہے۔
32 خانوں میں ایک سے 32 تک اعداد طبعی طور پر اس انداز میں آئے ہیں کہ مختلف انداز میں ان کی میزان 66 ہوتی ہے، مزید یہ کہ نقش کے اندر جو مثلثیں تشکیل پاتی ہیں ان میں سے ہر مثلث کے اعداد بھی 66 بنتے ہیں۔
ہم نے اپنی زندگی میں اس سے زیادہ موثر و باقوت اور حیرت انگیز نتائج کا حامل کوئی دوسرا نقش نہیں دیکھا جس کے فوائد بھی بے شمار ہیں اور خصوصاً قوت و غلبہ، اقتدار اعلیٰ، عزت و منزلت کے حصول میں بھی یہ اپنا لاثانی اثر دکھاتا ہے۔
تسخیرِ خلق و افسران و حکام، مقابلے میں کامیابی، سحر و جادو یا ماورائی اثرات ِبد سے حفاظت، دنیاوی حادثات اور بیماریوں سے تحفظ اس لوح اسم اعظم کی نمایاں خصوصیات ہیں۔
قصہ مختصر یہ کہ اسم اللہ کے اثر و طاقت کے بارے میں مزید کچھ کہنا چھوٹا منہ اور بڑی بات کا ماجرا ہوگا، ہم یہاں یہ لوح اسم اعظم اس کے تمام لوازمات کے ساتھ دے رہے ہیں۔
شرفِ شمس کے دوران میں اس لوح کو سونے، چاندی یا عقیق سرخ کی تختی پر کندہ کرنا افضل ہوگا، اگر اس کی توفیق نہ ہو تو ہرن کی جھلی پر یا گولڈن کاغذ پر مشک و زعفران اور عرق گلاب کی روشنائی سے با وضو ہوکر لکھا جائے اور اس دوران میں بخور عود و صندل سرخ کا جلایا جائے، لباس کو عطرِ مشک سے معطر کیا جائے۔
اس نقش کے 32 خانے ہیں اور نقش کی چال بہت سادہ اور آسان ہے، نمبر ایک سے شروع کرکے 32 تک تمام خانے ترتیب وار بھرتے چلے جائیں، نقش اپنی صحیح چال سے مکمل ہوجائے گا۔
نقش کے ارد گرد اسمائے شمس ابرصا صبرصا صارصا صورصا اور وکفیٰ بااللہ شہیداً محمد رسول اللہ لکھیں اور نقش کی پشت پر طلسم شمس، عزیمت اور موکلات لکھیں جو درج ذیل ہے۔
طلسم شمس یہ ہے
نقش کی پشت پر طلسم شمس اور موکلات کے نام لکھیں جو یہ ہیں ”یا روقیائل ابو عبداللہ المذہب”
اس کے نیچے یہ عزیمت لکھیں ”اللھم سخرت جمیع خلقک کما سخرت لسلیمان بن داود علیہ السلام
خاتم اسم اعظم
خاتم انگوٹھی کو کہتے ہیں، چناں چہ اسم اعظم کی انگوٹھی بھی نہایت موثر اور باقوت اثر کی حامل ہے لیکن فی زمانہ لوگ انگوٹھی پہننے سے گریز کرتے ہیں، خاص طور پر ہماری نئی نسل اور صاحب حیثیت و ثروت لوگ لہٰذا اسم اعظم سے متعلق خاتم بطور لاکٹ بھی استعمال کی جاسکتی ہے۔
لوح اسم اعظم میں قدرتی طور پر جو مثلثات تشکیل پارہی ہیں ان میں سے ہر مثلث کے اعداد 66 ہیں لہٰذا وہ لوگ جو مکمل لوح سے گریز چاہتے ہوں اور انگوٹھی یا لاکٹ کے طور پر اسم اعظم سے فیض یاب ہونا چاہتے ہوں انھیں اپنے مکمل نام کے پہلے حرف کے مطابق دی گئی 66 کی مثلث منتخب کرنا چاہیے۔
یہ کل 8 مثلثات ہیں جو حروف تہجی کے تمام حروف کا احاطہ کرتی ہیں، فرض کرداً آپ کا نام الف سے شروع ہوتا ہے تو وہ مثلث آپ کے لیے ہوگی جس میں عدد 1 موجود ہو، اگر ب سے شروع ہوتا ہے تو اس مثلث کا انتخاب کریں جس میں عدد 2 موجود ہو، البتہ آٹھویں مثلث ان لوگوں کے لیے ہے جن کے نام کا پہلا عدد 8 یا 9 ہو، اس کی تفصیلات ذیل میں دی گئی مثلثات کے ساتھ دی گئی ہیں تاکہ ہر شخص اپنے نام کے پہلے حرف کے مطابق اپنے لیے خاتم اسم اعظم منتخب کرسکے۔
خیال رہے کہ آپ کا مکمل اور درست نام وہ ہے جو آپ کے شناختی کارڈ پر موجود ہے، اس نام میں بھی خاندانی شناخت کا لفظ سید، خان، مرزا یا کچھ اور خاندانی یا قبائلی شناخت شامل نہیں ہیں۔
فرض کریں اگر نام سید عطاءاللہ بخاری ہے تو اصل نام صرف عطاءاللہ ہے یا آپ کا نام اگر محمد علی چیمہ ہے تو اصل نام محمد علی ہوگا، اسی نام کا پہلا حرف خاتم کے انتخاب میں مددگار ہوگا۔
شرف شمس کے موثر اوقات میں اس خاتم کو چاندی یا سونے کی انگوٹھی پرکندہ کیا جائے اور دیگر شرائط کا بھی خیال رکھا جائے، وہ لوگ جو انگوٹھی پہننے سے گریز کرتے ہیں وہ چاندی کے گول لاکٹ پر یا عقیق وغیرہ کے نگینے پرکندہ کرکے گلے میں بھی پہن سکتے ہیں اور بریسلیٹ کے طور پر کلائی میں بھی پہن سکتے ہیں،بہر حال یہ آپ کا مسئلہ ہے کہ آپ کو کیا بہتر لگتا ہے، ہم تمام ممکنہ استعمال کے طریقے گوش و گزار کر رہے ہیں۔
شرف شمس کے علاوہ خاتم اسم اعظم کو شرف قمر، شرف مریخ اور شرف مشتری میں بھی تیار کیا جاسکتا ہے، شرف قمر ہر ماہ ہوتا ہے لیکن موثر وہی ہوگا جو عروج ماہ میں آئے گا۔
شرف مریخ کا وقت ڈیڑھ سال میں ایک بار آتا ہے اور شرف مشتری تقریباً 12 سال میں ایک بار۔
