نیا سال آپ کے لیے کیسا ہوگا؟
علم الاعداد کے ذریعے 2025 کے بارے میں جانیے
اس میں کوئی شک نہیں کہ اعداد کا علم ایک نہایت دقیق وعمیق علم ہے۔ اعداد کی بازی گری کی آج ساری دنیا معترف ہے۔ بیس ویں صدی کو اگر علم ریاضی کے کمال کی صدی کہا جائے تو غلط نہ ہوگا۔ یہ سب اعداد و شمار کا ہی تو کھیل ہے کہ انسان، زمین تو کیا خلا کی وسعتیں ناپ رہا ہے۔ کروڑوں نہیں اربوں میل کے فاصلے پر واقع خلا میں تیرتے ہوئے ستاروں کے حدود اربعہ کا جامع حساب پیش کر رہا ہے۔
اگر یہ کہا جائے کہ علم ہندسہ میں کمال حاصل کئے بغیر انسان زندگی کے کسی بھی شعبے میں اور علم کی کسی بھی شاخ سے انصاف نہیں کر سکتا تو بجا ہوگا۔ قدیم ماہرین علم الاعداد نے اعداد کے باطنی خواص اور اسرار پر جو تحقیق وتجربات ماضی میں کیے تھے، جدید دور کے ماہرین علم الاعداد اس کی تصدیق کرتے ہیں۔ اس سے اندازہ ہوتا ہے کہ بابل و مصر اور یونان کی قدیم تہذیبیں علوم و فنون کے میدان میں کیا مقام رکھتی تھیں۔
قدیم کلدانی علم الاعداد میں ایک نمایاں مقام رکھتے تھے۔ ان کے طریقہ کار کو ماضی قریب کے ماہر علم الاعداد اور پامسٹ کیرو نے بہت توجہ سے تجربے کی کسوٹی پر پرکھا اور اپنایا۔ شاید اسی لیے اس نے اعداد کی مروجہ جدول (ٹیبل) کو نظر انداز کرکے کلدانیوں کی عددی جدول کو اہمیت دی جس میں 9 کے عدد کو نظر انداز کیا گیا۔
اس حوالے سے ان کا موقف تھا کہ 9 کا عدد اس لیے کوئی اہمیت نہیں رکھتا کہ وہ کسی بھی عدد کے ساتھ جڑتا نہیں ہے۔ اگر آپ نمبر 9 کو کسی دوسرے عدد میں جمع کریں تو 9 غائب ہوجائے گا جیسے 9+2=11 اور 1+1=2 ۔
آپ نے دیکھا کہ 2 کا عدد برقرار ہے 9 نمبر اس میں شامل نہیں ہوا، اسی طرح نمبر 9 کو کسی بھی عدد کے ساتھ ضم نہیں کیا جاسکتا۔ چناں چہ کلدانیوں کی عددی جدول میں 9 کا عدد نہیں ہے۔
دوسری بات، اعداد اور علم الحروف کے درمیان باہم ایک عددی ربط ہے لیکن دنیا میں بے شمار زبانیں موجود ہیں اور اس کے مطابق ہر زبان کے اپنے حروف تہجی ہیں۔ عربوں نے 28 حروف تہجی کے مطابق عددی جدول تیار کی۔ مغرب نے انگریزی یا اور دیگر ممالک نے اپنی اپنی زبانوں کے مطابق عددی جدول مرتب کی ہیں۔
یہاں سوال یہ پیدا ہوتا ہے کہ کس عددی جدول کو اختیار کیا جائے۔ ہم پاکستانی عام طور سے عربوں کی جدول سے کام لیتے ہیں لیکن آج دنیا میں بین الاقوامی سطح پر جو مقام انگریزی زبان کو حاصل ہے اس کو نظر انداز نہیں کیا جاسکتا۔ انگریزی ان ملکوں میں بھی اہمیت اختیار کرچکی ہے جن کی مادری زبان انگریزی نہیں ہے۔ پاکستان اور بھارت بھی اس کی مثال ہیں۔
چناں چہ کلیے کسی بین الاقوامی طور پر استعمال ہونے والی زبان کے مطابق ہی ہونا چاہئیں اور ہم اس نتیجے پر پہنچے ہیں کہ ہمیں بھی عربی یا کسی اور زبان کی عددی ٹیبل کے بجائے انگریزی زبان کو اولیت دینا چاہیے اور اس حوالے سے عام مروجہ ٹیبل کے بجائے کلدانیوں کی ٹیبل کو اہمیت دینا چاہیے جسے کیرو نے فروغ دیا، وہ ٹیبل درج ذیل ہے۔
آج ہم اعداد سے کام لینے کا ایک ایسا ہی قدیم طریقہ بیان کر رہے ہیں جو صدیوں سے مروج ہے اور ماہرین علم الاعداد نے اسے تجربے کی کسوٹی پر بارہا پرکھا ہے۔ اس طریقے سے آپ یہ معلوم کر سکتے ہیں کہ کوئی تعلق آپ کیلئے کیسا ہے۔ وہ تعلق کسی جاندار شے سے ہو یا بے جان شے سے۔ مثلاً اگر آپ یہ جاننا چاہیں کہ کسی شخص سے آپ کے تعلقات کیسے رہیں گے اور مستقبل میں ان کی نوعیت کیا ہوگی تو یہ طریقہ اس میں بھی مددگار ثابت ہوگا۔ یا اگر آپ یہ معلوم کرنا چاہیں کہ کون سا شہر ملک یا مکان آپ کیلئے کیسا رہے گا؟ تو اس سلسلے میں بھی اس طریقہ کار سے مدد لی جا سکتی ہے۔
اس کے علاوہ یہ طریقہ زندگی کے کسی بھی سال کے بارے میں آپ کو مناسب گائیڈ لائن دے سکتا ہے۔ جس سے آپ یہ جان سکیں گے کہ فلاں سال آپ کیلئے کیسا رہے گا؟ دلچسپ بات یہ ہے کہ یہ ایک نہایت ہی سادہ و آسان طریقہ ہے۔ اس سے فائدہ اٹھانے کیلئے آپ کو کوئی بہت زیادہ محنت بھی نہیں کرنی پڑے گی۔ آئیے ہم آپ کو اس کا بنیادی اصول سمجھاتے ہیں۔
ہر انسان کی زندگی پر کچھ اہم اعداد اثرانداز ہو رہے ہیں۔ جن میں سرفہرست اس کی تاریخ پیدائش کے اعداد ہیں اور اس کے بعد نام کے اعداد۔ تاریخ پیدائش کے اعداد کو ہم پہلے نمبر پر اس لئے رکھتے ہیں کہ یہ اللہ کی طرف سے مقرر کردہ ہوتی ہے۔ جبکہ نام انسانوں کا رکھا ہوا ہوتا ہے جسے تبدیل بھی کیا جا سکتا ہے۔ مگر تاریخ پیدائش کبھی تبدیل نہیں ہو سکتی۔
علم الاعداد کے اس طریق کار میں سب سے پہلے آپ کو اپنی تاریخ پیدائش کی ضرورت ہوگی یعنی پیدائش کے دن کی تاریخ اور مہینہ چاہیے ہوگا کیوں کہ تاریخ اور مہینے کے عدد کی حاصل جمع سے جو عدد حاصل ہوگا وہ اس طریق کار میں کلیدی کردار ادا کرے گا۔ مثلاً آپ کی تاریخ پیدائش کسی بھی سال میں اگر 27 فروری ہے تو ہم 27 تاریخ کا مفرد عدد معلوم کرینگے جو 9=7+2 ہوگا۔
اب فروری کا عدد ہمیں معلوم ہے، 2 ہے۔ کیونکہ یہ سال کا دوسرا مہینہ ہے لہٰذا اسے بھی تاریخ پیدائش کے مفرد عدد میں جمع کر لیں گے اور 11=9+2 ہوگا۔ اسے ایک مرتبہ اور جمع کیا گیا تو 2=1+1 کا عدد حاصل ہوا۔ چنانچہ معلوم یہ ہوا کہ 27 فروری کو پیدا ہونے والے شخص کا کلیدی مقسومی عدد 2 ہے۔
اب اگر ہم یہ معلوم کرنا چاہیں کہ فلاں شخص سے اس کلیدی مقسومی عدد کے مالک کے تعلقات یا مستقبل کی شراکت یا ازدواجی رفاقت کیسی رہے گی؟ تو اس کے نام کا عدد معلوم کریں۔ نام کا عدد نکالنے کا طریقہ ہم کئی بار لکھ چکے ہیں اور اس سلسلے میں اردو اور انگریزی کی جو ابجد استعمال ہوتی ہے وہ بھی کئی بار دے چکے ہیں۔ ہماری کتاب مسیحا حصہ اوّل میں بھی اس کا تمام طریقہ کار موجود ہے لہٰذا اسے یہاں دہرانے کی کوئی خاص ضرورت نہیں ہے۔
فرض کریں کہ جس شخص سے آپ اپنے تعلق کے بارے میں جاننا چاہتے ہیں اس کے نام کا عدد 4 ہے تو اس عدد کو اپنے کلیدی مقسومی عدد میں جمع کر دیں یعنی 6=2+4 ہوگا۔ اب نیا عدد 6 سامنے آیا۔ یہی وہ عدد ہے جو اس شخص سے یعنی متعلقہ فریق سے آپ کے تعلقات کو ظاہر کریگا۔ چنانچہ عدد 6 کی خصوصیات اور منسوبات کا مطالعہ کیجئے۔
مختصراً یہ کہ 6 کا عدد دوستی تعلقات اور محبت کا عدد ہے لہٰذا یہ شراکت یا تعلق خاصا جذباتی نوعیت کا ہو سکتا ہے اس کے علاوہ بھی عدد 6 کی خصوصیات کا تفصیلی مطالعہ اس تعلق کے دیگر پہلووں پر روشنی ڈالے گا۔ اسی طرح کسی بھی مکان، شہر، ملک، کاروبار وغیرہ سے متعلق عدد معلوم کرکے اپنے کلیدی مقسومی عدد میں جمع کریں اور پھر جو مفرد عدد حاصل ہو اس سے رہنمائی حاصل کریں۔
اگر یہ معلوم کرنا مقصود ہوکہ زندگی کا فلاں سال کیسا ہوگا تو اس سال کا عدد حاصل کریں مثلاً موجودہ سال 2025ء کا مفرد عدد 9 ہے۔ عدد 9 کو اپنے کلیدی مقسومی عدد میں جمع کرلیں اور پھر جو مفرد عدد ظاہر ہو اس کے نتائج دیکھیں لیکن اس کیلئے اعداد کی تمام خصوصیات زیادہ رہنمائی نہیں کر سکیں گی۔ اوپر دی گئی تاریخ پیدائش کی مثال میں عدد 2 سامنے آیا تھا۔ اسے موجودہ سال کے عدد کے ساتھ جمع کرلیں تو جواب میں عدد 2 ہی سامنے آئے گا لہٰذا موجودہ سال 2 نمبر کے اثرات کا حامل ہوگا۔
اس لئے ہم 1 سے 9 تک اعداد کی مخصوص خصوصیات دے رہے ہیں۔ جن سے آپ اپنی زندگی کے کسی بھی سال کے بارے میں جان سکتے ہیں کہ یہ کیسا ہوگا۔ یعنی اس سال میں کیسے حالات پیش آئیں گے اور آپ کو کس نوعیت کی کامیابیاں یا ناکامیاں پیش آ سکتی ہیں۔
ہم یہاں 1 سے 9 تک تمام اعداد کے جو اثرات لکھ رہے ہیں وہ صرف مندرجہ بالا قاعدے کیلئے مخصوص ہیں۔ علم الاعداد کے کسی اور قاعدے کیلئے کارآمد نہ ہونگے۔ کسی بھی سال کے عدد اور اپنی تاریخ پیدائش اور مہینے کے عدد کے حاصل جمع سے جو مفرد عددحاصل ہوگا اس کے نتائج مندرجہ ذیل ہونگے۔
نمبر 1 کے تحت سال کا جائزہ
اس عدد کا تعلق سیارہ شمس سے ہے۔ نمبر 1 کے تحت آپ کی خود اعتمادی اور حوصلے میں اضافہ ہوگا اور آپ کوئی نمایاں اور بڑا کام کرنے کے خواہش مند ہوں گے مگر ضروری ہوگا کہ مکمل غوروفکر اور منصوبہ بندی کے ساتھ کوئی قدم اٹھائیں اور اپنی توانائیاں اور صلاحیتوں کو کسی ایک ہدف پر مرتکز رکھیں۔ تب ہی یہ سال آپ کو کسی بڑی کامیابی سے ہمکنار کر سکتا ہے۔یہ خیال رکھیں کہ نمبر ایک کا سال آپ کی زندگی میں کوئی نیا آغاز ضرور لائے گا۔ وہ اچھا بھی ہوسکتا ہے اور برا بھی۔
اس سال آپ کیلئے یہی ضروری ہوگا کہ بعض معاملات کا ازسرنو جائزہ لیں اور بعض کاموں کو دوبارہ ابتدا سے شروع کریں۔ زیادہ بہتر یہ ہوگا کہ اپنے کام میں نیاپن لائیں اور کوئی نیا آغاز کریں۔ اس سال کچھ نئے لوگ اور کچھ نئے راستے آپ کے سامنے آئیں گے لیکن آپ کسی شراکت کے موڈ میں نہیں ہوں گے بلکہ اکیلے ہی کام کرنا پسند کریں گے۔
اگر آپ کی تاریخ پیدائش 1، 10، 19، یا 28 ہے تو اس صورت میں یہ سال آپ کیلئے مزید اہمیت کا حامل ہوگا۔ آپ یقیناً کسی نئے کاروبار کی بنیاد رکھیں گے یا نئی ملازمت شروع کریں گے۔ یہ بھی ممکن ہے کہ آپ پہلے سے اگرکسی منصوبے پر کام کررہے تھے تو اس سال اسے پایہ تکمیل تک پہنچائیں گے۔ یہ سال ذاتی تعلقات کے حوالے سے بھی اہم ثابت ہوگا۔ آپ ایسے لوگوں سے ربط و ضبط بڑھانا پسند کریں گے جو معاشرے میں کوئی اعلیٰ مقام اور مرتبہ رکھتے ہیں۔
اس کے ساتھ ہی اپنے سے چھوٹے لوگوں سے بھی بہتر تعلقات کی ضرورت محسوس کریں گے۔ اگر آپ کی زندگی میں اس سے پہلے کسی تعلق یا رشتے میں اختلافات اور تنازعات موجود ہیں۔ ان کا خاتمہ کرنے کے بارے میں سوچیں گے۔ ایسے اختلافات محبت کے سلسلے میں پیدا ہوئے ہوں یا کاروباری نوعیت کے ہوں۔
نمبر 2 کے تحت سال کا جائزہ
نمبر 2 کا تعلق سیارہ قمر سے ہے۔ اس نمبر کے تحت اس سال تعلقات پر زور رہے گا اور آپ دوسرے لوگوں سے تعلقات قائم کرنے میں کوئی دشواری محسوس نہ کریں گے۔ آپ کیلئے یہ ایک ایسا سال ہے جو ڈپلومیسی کے ذریعے کامیابی کے راستے دکھائے گا۔ یعنی اس سال آپ کو مصلحت آمیز دہرے پن، مفاہمت اور اپنی قابلیت سے کام لینا ہوگا۔ آپ نے گزشتہ سال جو بھی کام شروع کئے تھے انہیں تیزی سے آگے بڑھانے میں مدد ملے گی۔ مگر کسی معجزے کے انتظار میں نہ رہیں اچانک اس کی رفتار کم ہو سکتی ہے۔
دراصل عدد 2 تبدیلیوں کا مظہر ہے لہٰذا اس سال آپ کی زندگی میں کچھ نئی تبدیلیاں خصوصاً آپ کے کام یا رہائش کے حوالے سے آسکتی ہیں۔ یہ بھی ممکن ہے کہ آپ ایک جگہ سے دوسری جگہ ہجرت کر جائیں۔ یعنی شہر یا ملک ہی تبدیل کر لیں یا اپنی کاروباری جگہ میں کوئی تبدیلی لائیں۔ اس سال آپ کے رومانی جذبات واحساسات بھی عروج پر ہونگے۔ مخالف جنس کی طرف سے آپ زیادہ کشش محسوس کریں گے۔ محبت، منگنی اور شادی کے مسائل میں کامیابی ہو سکتی ہے اور آپ کو اپنے خوابوں کی پسندیدہ تعبیر مل سکتی ہے۔
اگر آپ کی تاریخ پیدائش 2، 20 یا 29 ہے تو اس بات کا یقین کر لیں کہ اس سال آپ کی زندگی میں یقیناً کوئی بڑی تبدیلی یا بڑا واقعہ رونما ہوگا۔
کام اور کیرئیر کے حوالے سے یہ سال کسی بڑی تبدیلی کی نشاندہی کر رہا ہے ممکن ہے وہ تبدیلی عارضی طور پر آپ کیلئے سخت پریشانی کا باعث ہو مگر آپ کو یہ سمجھ لینا چاہئے کہ تبدیلیاں ہی ترقی کے نئے راستے کھول سکتی ہیں۔ اس سال اگر آپ کو ملازمت میں ٹرانسفر یا کاروبار میں کسی انقلابی اتارچڑھاو سے واسطہ پڑے تو تعجب کی بات نہ ہوگی۔
بہرحال آپ کیلئے ضروری ہے کہ اپنی زندگی کو آسان بنانے پر توجہ دیں اور ایسے کام نہ کریں کہ مشکلات میں اضافہ لانے کا سبب ہوں۔ کیونکہ اس بات کا قوی امکان ہے کہ آپ کچھ زائد ذمہ داریاں قبول کر لیں یا وہ آپ پر زبردستی ڈال دی جائیں۔ ایسی صورت میں پسپائی اختیار کرنا بھی درست نہ ہوگا کیونکہ اس سے آپ کی ساکھ اور حیثیت کو دھچکا پہنچ سکتا ہے۔ بہتر ہوگا کہ ایسے چیلنجوں کو قبول کرنے سے پہلے مستقبل کے فوائد کے بارے میں ضرور سوچ لیں۔ اگر وہ معقول نظر آئیں تو پھر محنت سے نہ گھبرائیں۔
نمبر 3 کے تحت سال کا جائزہ
نمبر 3 کا تعلق سیارہ مشتری سے ہے۔ اس نمبر کے تحت اس سال کے دوران میں آپ کی تخلیقی اور تصوراتی صلاحتیں عروج پر ہوں گی اور اپنے آپ کو وسعت دینے اور نکھارنے کے مواقع ملیں گے آپ گہرا تاثر دینے کیلئے یعنی دوسروں پر گہرا اثر النے کیلئے اپنی شخصیت کونمایاں کرسکتے ہیں۔
جان لیجئے کہ آگے بڑھنے اور اپنے آپ کو وسعت وترقی دینے کی راہ پر ڈالنے کیلئے یہ ایک اچھا سال ہے۔ آپ کیلئے سماجی اور فنکارانہ فروغ دلچسپ اور سود مند ثابت ہوگا اور خوشیوں کے حصول میں مددگار ثابت ہوگا۔ آپ کے اندر اپنے آپ کو فروغ دینے یا اپنے امیج کو بہتر بنانے، اپنے وقار میں اضافہ کرنے یا اپنے ذہن کو نکھارنے کی زبردست خواہش جنم لے گی آپ کی مقبولیت میں بے پناہ اضافہ ہوگا اور آپ اپنی مقبولیت سے خوش ہوں گے۔
کسی تخلیقی کام سے وابستگی فائدہ مند ثابت ہوگی اور اس سے آپ کوذاتی طور پراطمینان وسکون حاصل ہوگا لیکن بہر حال یہ ضروری ہے کہ آپ اپنے مزاج کوخوشگوار رکھیں۔ اس سے لوگ آپ کی طرف متوجہ ہوں گے اور آپ کی تمام صلاحیتوں کو سراہا جائے گا۔ جو کام آپ نے دو سال پہلے شروع کئے تھے اس سال آپ اس کا پھل کھائیں گے۔
اگر آپ برج حوت یا قوس کے تحت پیدا ہوئے ہیں یا آپ کی تاریخ پیدائش 3، 12، 21 یا 30 ہے تو یہ سال آپ کی کامیابی کیلئے بالخصوص بے حد اہم ہوگا۔
کام اور کیریئر
جیسا کہ اوپر بیان کیا گیا ہے کہ یہ سال عدد 3 کے تحت آگے بڑھنے اور ذاتی فروغ کا ہے۔ لہٰذا کسی بھی نئی بات یا نئی چیز کیلئے تیار رہیں۔ اس میں کوئی تعجب نہیں کہ آپ کا کیریئر بہت روشن اور تابناک نظر آتا ہے۔ آپ یقیناً بہت پرعزم ہوں گے۔ اپنی سوچ مثبت رکھیں اور مواقع سے فائدہ ا ٹھائیں۔ اپنے فرائض سے نظریں نہ چرائیں۔
اس سال اپنے تمام فرائض اور ذمہ داریوں کا احساس پیدا کرنا بہت ضروری ہے۔ آپ کوئی نیا کورس شروع کرسکتے ہیں یا نئی ملازمت تلاش کرسکتے ہیں یا کسی بھی طرح اپنی علمیت اور صلاحیت میں اضافہ کرسکتے ہیں۔
نمبر 4 کے تحت سال کا جائزہ
کلیدی مقسوی نمبر4 کا تعلق راہو سے ہے۔ اس نمبر کے تحت اس سال بنیاد پر زور ہے۔ کمزوربنیادوں پر کوئی کام شروع نہ کریں۔ اپنے آپ کو منظم کریں اور معمول سے زیادہ محنت کرنے کیلئے خود کو تیار کریں۔ اسی طرح آپ اپنی بڑی مشکلات پر قابو پاسکیں گے۔ خیال رہے کہ یہ سال آپ کے لیے آسان نہیں ہوگا اور اس سال کسی بڑی غلطی کی کوئی گنجائش نہیں ہے۔خاص طور پر اس سال غیر قانونی کاموں سے خود کو دور رکھیں۔
آپ کیلئے کوئی جامع منصوبہ بندی بہت ضروری ہے۔ بے سوچے سمجھے عجلت میں اور نتیجے کی پروا کئے بغیر کوئی کام نہ کریں۔ اسی طرح دل کے بہلاوے کیلئے بھی کوئی کام یا مشغلہ اختیار نہ کریں۔
اس بات کا امکان ہے کہ آپ بہت سی ذمہ داریاں اکٹھی کرلیں گے اور وقتاً فوقتاً ان سے الجھ کر اپنے بوجھ میں ا ضافہ کرلیں گے۔ یہ کہنا درست ہوگا کہ یہ سال آپ کی انفرادی زندگی میں ایک خاص حدود وقیود متعین کرے گا چاہے یہ جسمانی ہو، نفسیاتی ہو یا مالی۔ اب آپ کواپنی ہمت مجتمع کرکے مزید ٹھوس بنیادوں پر خود کو استوار کرنا ہے۔ اس وقت آپ کے لیے اپنا تحفظ بہت ضروری ہے۔
جب کسی منصوبے، آئیڈیے یا جاب کی بات ہوتو آپ کیلئے ضروری ہے کہ صحیح سوال پوچھیں، یعنی حقیقت سے نظریں نہ چرائیں دوسرے لفظوں میں اپنا ہوم ورک کریں اور آنکھیں بند کرکے کنوئیں میں چھلانگ مت لگائیں۔ ورنہ پریشانیوں میں اضافہ ہوسکتا ہے۔
دوسروں سے تعلقات
آپ دیکھیں گے کہ اس مخصوص سال کے دوران میں خلاف معمول غیر روایتی، سنکی اور بے حد عجیب وغریب لوگ یا چیزیں آپ کی طرف کھینچی چلی آرہی ہیں۔ اس کا بھی قوی امکان ہے کہ وہ لوگ جن سے آپ کچھ عرصے پہلے ملے ہیں، دوبارہ آپ کے حلقے میں داخل ہورہے ہوں یا کوئی بزرگ ہستی یا آپ کے سماجی حلقے سے باہر کی کوئی مذہبی شخصیت بھی آپ کی جانب متوجہ ہوجائے۔
جہاں تک آپ کی زندگی کے جذبات اور رومانوی پہلو کا تعلق ہے آپ ایک بار پھراس طرف کھینچیں گے جو خلاف معمول ہوگا۔ آپ کسی ایسی شخصیت سے بھی تعلقات استوار کرسکتے ہیں جو شاید آپ کیلئے اجنبی یا دور پار کا اور بالکل ہی مختلف پس منظر کا حامل ہوگا۔ ان لوگوں میں کوئی ایسی خلاف معمول بات ہوگی جو آپ کو بہت دلچسپ لگے گی اور آپ کے اندر تحریک پیدا ہوگی جو آپ کو بہت دلچسپ لگے گی۔
کام اور کیریئر
زندگی کے اس پہلو میں بھی ایک بار پھر ”خلاف معمول“ کا عمل دخل نظر آتا ہے۔ آپ اپنی پرانی ڈگر پر چل رہے ہوں گے کہ اچانک جیسے بجلی کوند جائے اور آپ پر ہر طرف سے پیشکش کی بارش ہونے لگے گی۔ آپ یقیناً اس صورتحال پر بوکھلا اٹھیں گے اورآپ کی سمجھ میں نہیں آئے گا کہ کیا کریں، کیا نہ کریںِ؟
جبکہ ایسا وقت بھی گزرے گا جب کسی بھی معاملے میں کوئی خاص پیش رفت نظر نہیں آئے گی۔ مگر پھر اسی دوران اچانک آپ کا پروموشن یا کوئی سنسنی خیز چیلنج آپ کو ایک خوشگوار حیرت سے دوچار کردے گا۔ زندگی کے اس خاص چکر کے دوران میں آپ کے ساتھ عملی طور پرکچھ بھی پیش آسکتا ہے۔ نمبر 4 کے زیر اثر یہ سال آپ کو نئی ذمہ داری بھی سونپ سکتا ہے۔ لیکن آپ کے لیے یہ بہت ضروری ہے کہ آپ وہ ذمہ داریاں دوسروں کے سر پر نہ تھوپ دیں یا ان سے بچ نکلنے کی کوشش نہ کریں کیونکہ آپ کواس کا اضافی حصہ ملے گا اور اس سے نہ صرف آپ کے تجربات میں اضافہ ہوگا بلکہ آگے چل کر آپ کی ترقی کی راہ بھی ہموار ہوگی۔
(حصہ دوم کے لیے اس لنک پر کلک کریں)
